中午去咗公司附近嘅大排檔開餐,叫咗碟星洲炒米,跟一碟生菜同凍飲,經濟價24蚊。兜星洲米超大碟,預咗食唔晒,諗住食三份之二就收手,點知就係响食到三份之二嘅時候,發現有一隻小強伏屍响米粉之上,小強如一粒豆豉般大小,嚇得我連忙將口內嘴嚼中嘅米粉吐出來...

驚魂鋪定,即叫老闆嚟跟進問題,老闆了解過事件之後向我道歉,仲話炒過一碟俾我,我同佢講我已經食飽咗,再炒一碟俾我盞嘥晒D食物;而且我根本一D都唔嬲,响大排檔食嘢有一隻半隻小昆蟲並唔出奇。大排檔老闆最終定出解決方案,為咗表示歉意,哩餐晏佢只收我六蚊!

我懷住無比興奮嘅心情踏出大排檔,今次食咗餐咁抵嘅晏,都係多得哩隻"豆豉版小強屍骸"嘅功勞,真係感激不盡! 豆豉版小強呀,如果您在天有靈,就叫您D弟兄姊妹每次响我食街外飯嘅時候都伏屍一隻响我碟飯喥啦!咁我年終就可以慳翻唔少飯錢喇~~~(我懇切地禱告中)